გელით facebook–ზე

28.01.2009

Saawariya

სიყვარულის ისტორიების ფაბრიკა – ასეც შეიძლება ვუწოდოთ ბოლივუდს. ბოლივუდური ფილმების მიმართ დამოკიდებულება არაერთგვაროვანია, მით უმეტეს საქართველოში. არის კატეგორია ადამიანებისა, რომელიც აღმერთებს ამ ფილმებს და ამ ფილმებით სულდგმულობს თითქმის მთელი ცხოვრება, და ასე არის კატეგორია, რომელთათვისაც კატეგორიულად მიუღებელია ეს ფილმები, ასეთ ფილმებს ნაგავს უწოდებს და შეუძლია კიდეც იამაყოს იმით, რომ აი ინდური ფილმები არ მომწონს, და aმიტომ მე კაი ტიპი ვარ, არ ვარ გოიმი და სოფლელი...

მაგრამ ამჯერად ამაზე არ ვილაპარაკებ. საქმე ეხება სიყვარულის კიდევ ერთ ისტორიას. სურათის სახელია Saawariya, რომლის პირდაპირ ქართულად თარგმნა ძალიან გამიჭირდა, ამიტომ დავწერ რუსულად, რასაც ნიშნავს – „Возлюбленная“. შეიძლება ითქვას, რომ თავიდან ბოლომდე ეს ფილმი არც მაქვს ნანახი. საქმე იმაშია, რომ ბოლივუდში გამოშვებული ბოლო ფილმები ბოლომდე რომ ნახო, რაღაც გარკვეული ძალისხმევა გჭირდება ადამიანს, ამიტომ ვცდილობ მათგან ავიღო ის, რაც მეტად უფრო მიმზიდველი და სასიამოვნოა ჩემთვის – სიმღერა, მუსიკა, ცეკვა :)

Saawariya–ს პრემიერა 2007 წელს შედგა, სწორედ ჩემი მუმბაიში ყოფნის დროს, ისევე როგორც ფილმისა „Om Shanti Om“. ტელეარხები (რომელთა რაოდენობა ასეულობით ითვლება) გამუდმებით ატრიალებდნენ ტრეილერებს ამ ფილმებიდან, და ყველგან, რომელ ქალაქშიც არ უნდა ყოფილიყავი იმ დროს, რომელ კაფეშიც არ უნდა შესულიყავი ან ნებისმიერი საზოგადოებრივი თავშეყრის ადგილებში, ყველგან ისმოდა მუსიკა ამ ახალი ფილმებიდან.

ამ ყველაფერს არ გავიხსენებდი, რომ არა გუშინდელი შემთხვევა. საკაბელო ტელევიზიით რუსულეონვან არხზე ინდოეთის შესახებ ერთ გადაცემას ვუყურებდი, რომელშიც ინდური კერძების მომზადებას ეხებოდა. ერთმა ჩემმა მეგობარმა (ყველა მეგობარმა კარგად იცის ჩემი დამოკიდებულება ინდოეთის მიმართ) მაიძულა სხვა არხზე გადამერთო. შემთხვევით ეს არხი „კომედია“ აღმოჩნდა, სადაც ინგლისური ფილმი გადიოდა ინგლისში მცხოვრები ინდოელების შესახებ. ფილმი ევროპულია, მაგრამ რა ფილმი იქნებოდა ინდოელებზე, თუ მუსიკა და ცეკვა არ იქნება. ჰო და როცა ისევ გახურდა ეს ყველაფერი, ისევ მაიძულეს გადამერთო. უფრო სწორად ცოტა გაღიზიანებულმა პულტი მივაწოდე და ვუთხარი მეგობარს, თვითონ აერჩია სასურველი არხი (დრო გაგვყავდა საღამოს). ჩართო არხი „პრემიერა“ და ერთი კადრის დანახვაც საკმარისი იყო ჩემთვის, რომ მივხვდი ამ არხზე Saawariya გადიოდა. ხმა არ ამომიღია და ვაკვირდებოდი მეგობრის რეაქციას, რას მოიმოქმედებდა, როცა ისევ მუსიკა და ცეკვა–თამაში გახურდებოდა ეკრანზე. ალბათ ინფარქტიც დაემართებოდა, რომ არა Saawariya–ს საინტერესო მხატვრული გაფორმება. ფილმი ზღაპრის სტილშია გადაღებული, არის ელემენტები, რითაც „მულენ რუჟსაც“ წააგავს და ალბათ ეს გახდა მიზეზი, რომ მეგობარმა რამდენიმე ხანი დააყოვნა და ჩემთან ერთად უყურებდა. საბოლოოდ, როგორც ყოველთვის და ყველას, ნერვებმა უმტყუნა და ბოლომდე ვერ გაუძლო :)

ჩემთვის კი ეს ყველაფერი, რომ 3–4 არხზე ერთდროულად გადიოდა ფილმები და გადაცემები ინდოეთზე, ის, რომ ამ ბლოგზე ვმუშაობ, ის რომ ჩემი ახდენილი ოცნება ახალი ოცნებებისკენ მიბიძგებს, და კიდევ სხვა მიზეზები, ის, რომ აქაც გამიღიმა ბედმა და გავიჩინე ინდოელი მეგობრები, მოკლედ, ყველაფერი, მიზეზი გახდა იმისა, რომ Saawariya–ს ზღაპარში გადავვარდნილიყავი.

ახალი ინდური ფილმებიდან ბევრი არაა ისეთი, რომელიც მუსიკით და სიმღერებით აღმაფრთოვანებს, მაგრამ Saawariya, ისევე როგორც „ომ შანტი ომ“ და კიდევ ერთი–ორი ფილმი, გამონაკლისებია. თან რუსულ არხზე ფილმი დუბლირებული იყო და შესაძლებლობა მქონდა გამეგო, რა ხდებოდა რეალურად ფილმში. როგორც აღმოჩნდა რანბირ კაპურის (რაჯ კაპურის შვილიშვილი) გმირი მუსულმან გოგონაზეა შეყვარებული. ფილმში არის საკმაოდ გულახდილი სცენა, რაც ინდური კინოსთვის დამახასიათებელი არ იყო, სადაც რანბირ კაპური, ეს ახალგაზრდა სიმპატიური ყმაწვილი თითქმის დედიშობილა ცეკვავს და საინტერესო მოძრაობებს აკეთებს. მუსიკაც საკმაოდ სასიამოვნო მოსასმენია. ეს ნაწყვეტი ფილმიდან ამ კლიპში შეგიძლიათ ნახოთ.

და კიდევ, არის ფილმში მომენტი, როცა რანი მუკჰერჯის გმირი, მოცეკვავე და მსუბუქი ყოფაქცევის ქალი, რომელიც თავის მხრივ რაჯის (რანბირ კაპური) მიმართ გულგრილი არ არის, უმღერის მას და თითქოს დასცინის, რა მდგომარეობაში ჩააგდო სიყვარულმა ეს ახალგაზრდა. რანი მუკჰერჯი პირველად ვნახე ასეთი ქალის როლში, ცოტა გამიკვირდა, ამ ქალს დიდი ხანია ბოლივუდში აუღებელი ქალწულის სახელი ჰქონდა, მაგრამ იმის გათვალისწინებით (в тихом болоте черти водятся), რომ როგორც აღმოჩნდა რანიმ ახალი მეგობარი გაიჩინა და ეს კაცი ცოლიანია, რის გამოც რანის კიცხავენ კიდეც, მისი ეს როლი Saawariya–ში შეიძლება გარკვეულ წინასწარმეტყველებადაც კი ჩათვალონ :)

ფილმი ალბათ კიდევ რამდენიმე დღე იტრიალებს „HTB პრემიერაზე“, ასე რომ ვისაც ზღაპრები და ინდური სიმღერები მოსწონს, შეუძლია დატკბეს რანბირ კაპურისა და რანი მუკჰერჯის გმირების თავგადასავლით. ხოლო ვისაც სურვილი აქვს გადაწეროს ფილმი ქართული სერვერიდან კომპიუტერში, ამის გაკეთება შეგიძლიათ ამ ლინკიდან >>>>>>

2 комментария:

Анонимный комментирует...

ესეიგი, გვირჩევ რო ვუყუროთ ამ ფილმს იმ კატეგორიის ხალხმა, რომლებსაც გვიკვარს ინდური კინო და არ ვთვლით რო გოიმები ვართ ხო:))))))))))
ცჰემი ახლობლების უმრავლესობაც მასე ფიქრობს მაგრამ სულამოუთქმელად უყურეს მილიონერს ჯურღმულებიდან და პროვოცირებულს, ასევე ჯოდხა და აკბარს!
მადლობა კიდე ერთხელ საინტერესო ბლოგისათვის. ნათია

სოსო комментирует...

ნათია, დიდი მადობა კომენტარებისთვის. ხო ამ ფილმს რაც შეეხება, ალბათ უნდა უყურო, თუ მართლა გაინტერესებს ინდური კინო. და გოიმები საიდან მოიტანე? სადმე რამე მსგავსი ვთქვი? :):):)
მილიონერს რაც შეეხება, მეც ვაყურებინე ჩემს მეგობრებს, თან ისეთებს, რომლებსაც ინდური მუსიკის გაგონებაზეც კი აჟორჟალებს, მაგრამ მილიონერს ერთ ამოსუნთქვაზე უყურეს და მაგრად ვიხალისე ამაზე. მე თვითონ ნანახი მქონდა, და როცა მეგობრებთან ერთად ვუყირებდი, მეტწილად მათი რეაქცია უფრო მაინტერესებდა :) ამაზე სხვა პოსტებშიც მიწერია, საერთოდ მილიონერს ბევრი პოსტი დავუთმე ბოლგზე.
საავარია კი ჩემი ტკბილი მოგონებაა, განსაკუთრებით მუმბაის, და იმდენად მოქმედებს მისი მუსიკაც ჩემზე, რომ ხშირად ვერ ვუსმენ, ნამეტანი ნოსტალგია მკლავს :)