გელით facebook–ზე

25.07.2009

ბოლივუდის სიახლეები მოკლედ

შაჰიდ კაპურს რაჯივ განდის პრემია მიანიჭეს

28 წლის მსახიობს შაჰიდ კაპურს რაჯივ განდის სახელობის პრემია მიანიჭეს. მანამდე ეს პრესტიჟული პრემიები მიუღიათ ამიტაბჰ ბაჩანს, შაჰრუქ ანს და აიშვარია რაის. წელს შაჰიდის მონაწილეობით სამი ახალი ფილმი გამოდის: Kaminey (რეჟისორი ვიშალ ბჰავარჯი), Dil Bole Hadippa! (რეჟისორი ანურატ სინგჰი) და ამ ფილმში შაჰიდის პარტნიორი რანი მუქერჯი იქნება, რომელსაც მამაკაცის ტანსაცმელში გადაცმული მუსიკოსის როლის შესრულება მოუწია, და მესამე ფილმია რეჟისორი კენ გჰოშის Yahoo.

პრეზიდენტი მთავარ როლში

ინდოეთის ყოფილმა პრეზიდენტმა დოქტორმა აბდულ ქალამმა მონაწილეობა მიიღო ფილმში „მე ქამალი ვარ/ Main Kalam Hoon“ (რეჟისორი მადჰავ პანდეია). ფილმის პრემიერა კანის კინოფესტივალზე შედგა. სურათი სხვა საერთაშორისო კინოფესტივალებზეც იქნება ნაჩვენები. დოქტორი აბდულ ქალამი საკუთარ თავს თამაშობს. სურათის მიხედვით, რაჯასტანის ჯურღმულებში პრეზიდენტი პატარა ბიჭს შეხვდა, რომელსაც ქვეყნის პრეზიდენტობა სურს. ფილმში ასევე მონაწილეობს ფრანგი მსახიობი სოფი ბრუსტალი, რომლის გმირიც ინდოეთში ბედნიერების საძიებლად ჩავიდა და რომელსაც ინდოელი მამაკაცი შეუყვარდება, რომელსაც გულშან გროვერი ასრულებს.

აიშვარიას მაკიაჟი

მშვიდი და აუღელვებელი აიშვარია რაი–ბაჩანი სულაც არ დუმს, როდესაც სიტუაცია ისე განვითარდება, როგორც მას არ მოესურვება. სულ ახლახანს აიშვარიამ თავისი ნატურის აგრესიული მხარეც გამოავლინა, როდესაც უარი განაცხადა სონამ კაპურთან ერთად კანის კინოფესტივალის წითელ ხალიჩაზე გავლაზე. ამჯერად კი სკანდალი მოხდა რეჟისორ ვიპულ შაჰის ფილმის Action Replay გადაღებაზე, სადაც აიშვარიამ უარი თქვა უცხოელ ვიზაჟისტებთან მუშაობაზე, რომლებიც სპეციალურად ფილმისთვის დაიქირავეს, და მოითხოვა, რომ მისთვის მაკიაჟი მის პირად ვიზაჟისტს ოჯას რაჯანის გაეკეთებინა.

ვიპულ შაჰმა მაკიაჟის სფეროში საუკეთესო პროფესიონალები დაიქირავა მსახიობებთან სამუშაოდ. მსახიობები უბრალოდ უნდა მისულიყვნენ ვიზაჟისტებთან საგრიმიოროში მაკიაჟის დასადებად. ყველაფერი ისე იყო მოწყობილი, როგორც ჰოლივუდში. ყველა სხვა მსახიობმა ეს შეასრულა, მაგრამ აიშვარიამ თხოვნის იგნორირება მოახდინა, მისი ვარსკვლავის საერთაშორისო სტატუსის გათვალისწინებით. რეჟისორი შეშინდა, რომ აიშვარიას გამოხტომებმა შესაძლოა ფილმის გადაღებები შეაფერხოს.

აიშვარიას მხრიდან ასეთი დემარშები პირველი არ არის. ადრე მას მსგავსი პრობლემა შეექმნა ფილმის „პატარძალი და ცრურწმენები“ გადაღებებზე, სადაც მას ოსტატების საკუთარი შტატი ჰყავდა აყვანილი. მაგრამ რეჟისორი ვიპულ შაჰი უარყოფს ყველა ამ ინფორმაციას და ამბობს, რომ ეს სრული ნაბოდვარია. „არ ვიცი, რატომ ცდილობენ აიშვარიას წარმოჩენას ცუდი სახით. ის ნამდვილი პროფესიონალია და არასდროს გააკეთებდა რამე ისეთს, რაც ფილმის გადაღებებს საფრთხეს შეუქმნიდა“. ამის შესახებ წერს mumbaimirror.com.

19.07.2009

ჰოლივუდი–ბოლივუდი თუ ბოლივუდი–ჰოლივუდი

მუმბაი – „ექსტრემალური ქალაქი“

მუმბაის ჯურღმულები თავისებურ გადასაღებ მოედნად იქცა ჰოლივუდური და ბოლივუდური ფილმებისთვის. მსოფლიოში ცნობილი ჰოლივუდელი კინოსცენარისტი პოლ შრედერი ასრულებს მუშაობას სცენარზე ტრილერისთვის „ექსტრემალური ქალაქი“, რომელსაც მუმბაის ჯურღმულებში და დჰარავის ჯურღმულების გარშემო გადაიღებენ. მუმბაიში პროდიუსერ ანუბჰავ სინჰასთან ახლახანს გამართული შეხვედრის შემდეგ პოლ შრედერმა განაცხადა: „ჩვენი პროექტი გაცილებით ადრე იყო ჩაფიქრებული, ვიდრე ეკრანებზე დენი ბოილის ფილმი (მილიონერი ჯურღმულებიდან) გამოვიდოდა“. ანუბჰავ სინჰამ თავის მხრივ თქვა: „ჩვენ გვინახავს ჰოლივუდური ფილმები სიცილიურ მაფიაზე, ბრაზილიურ მაფიაზე. ახლა ჩვენ ვიხილავთ ფილმს ინდური მაფიის შესახებ. ფილმის დიდი ნაწილი მუმბაიში იქნება გადაღებული. ერთ ერთ მთავარ როლს ფილმში ცნობილი ჰოლივუდელი ვარსკვლავი შეასრულებს, ხოლო მეორე – არანაკლებ მნიშვნელოვან როლს – ბოლივუდის კინოვარსკვლავი. სურათი ინგლისურ ენაზე იქნება გადაღებული, მაგრამ ინდიელი მსახიობები, რა თქმა უნდა ჰინდიზე ილაპარაკებენ“.

ჩემი მხრიდან დავამატებ, რომ მოუთმენლად დაველოდები ამ ფილმის გამოსვლას, თუნდაც „მილიონერთან“ შესადარებლად, თუნდაც ახალი სახეებისა და ჯურღუმლების ცხოვრებაზე ახალი დეტალების შესატყობად :) უნდა ვაღიარო, რომ როცა მუმბაიში ვიყავი და სანაპიროებზე გასერინება გადავწყვიტე მარტო, მეგობრების გარეშე, მოტორიქშათი, ორ სანაპიროზე მიმავალი გზები სწორედ რომ ჯურღმულებზე გადიოდა. ცოტა არ იყოს და შევცბი, როცა მოულოდნელად ასეთ გარემოში აღმოვჩნდი. ყველა მარწმუნებდა, რომ საშიში არაფერია, მაგრამ მაინც. ახლა შეიძლება ვნანობ კიდეც, რომ ასე მეშინოდა. და მრცხვენია ამის :) ნამდვილ ცხოვრებას, ნამდვილ ექსტრიმს ასე ვერ გაუგებ გემოს. თუ ბედმა გამიღიმა, სხვა დროს აუცილებლად გამოვასწორებ შეცდომას, ანუ ჯურღმულებში ვისეირნებ :)

ინდური კინოკომპანია სპილბერგის ფილმებს ასპონსორებს

ინდურმა კინოკომპანიამ Reliance Anil Dhrubhai Ambani Group» (ADAG) და სტივენ სპილბერგის კინოსტიდიამ Dreamworks–მა ნიუ–იორკში თანამშრომლობის ხელშეკრულებას მოაწერეს ხელი, რომლის თანახმადაც ჰოლივუდური კინოსტუდია 825 მილიონ დოლარს მიიღებს ფილმების საწარმოებლად. როგორც ცნობილია Dreamworks შეიქმნა 1994 წელს, ხოლო 2008 წლის ნოემბერში ეს სტუდია 1,5 მილიარდ დოლარად იყიდა ADAG–ის შემადგენლობაში შემავალმა ინდურმა კინოკომპანიამ Reliance Big Entertainment» (RBE). ამიერიდან Dreamworks კომპანია RBE–ს შემადგენლობაში წელიწადში 5–6 ფილმის გამოშვებას შეძლებს. სპილბერგმა პირობა დადო, რომ წელს ინდოეთში ჩავა და ინდური სტუდიებისა და სცენარისტების შესაძლებლობებს გაეცნობა.


სხვა სტატიები ამ თემაზე:
*
ბოლივუდი კინოსამყაროს დაპყრობას განაგრძობს
*
Warner Brothers ინდური კინოს წინააღმდეგ
*
ბოლივუდი, მოლივუდი, ტოლივუდი, კოლივუდი და ა.შ.
*
ახალი სიურპრიზები დენი ბოილისგან
*
ვნებანი მილიონერის გარშემო გრძელდება
* მუმბაის ხელისუფლებამ „ჯურღმულელი მილიონერის“ 20–მდე პატარა გმირი ქუჩაში გაყარა
* ფრეიდა პინტო მსოფლიოს ყველაზე სექსუალური ქალების სიაში
* «მილიონერის“ მიერ გამოწვეული მღელვარებანი არ ცხრება
* რუბინას მამას ქალიშვილის გაყიდვა სურდა 200 ათას გირვანქად
*„ჯურღმულელი მილიონერის“ მსახიობ ბავშვებს გაუმართლათ
* მილიონერმა მუმბაის ჯურღმულებიდან თბილისში ჩამოაღწია
* სიურპრიზი ოსკაროსანი „მილიონერის“ ფანებს
* ფილმის „მილიონერი ჯურღმულებიდან“ ტრიუმფი „ოსკარით“ დაჯილდოების ცერემონიაზე
* „მილიონერი ჯურღმულებიდან“ ნამცხვარი „ნაპოლეონის“ შეფუთვით
* ფილმმა „მილიონერი ჯურღმულიდან“ მთავარი „ოქროს გლობუსი“ მიიღო
* მოგზაურობა დარჯილინგში

ჰემა მალინი აიშვარიას აქებს

ბოლივუდისთვის „ოცნების ქალის“ ორიგინალი ჰემა მალინია, ხოლო სილამაზის დედოფალი, რომელიც შემდგომში მსახიობი გახდა – აიშვარია რაი ნამდვილად იმსახურებს 21–ე საუკუნის „ოცნების ქალის“ წოდებას. „იმ გოგონებს შორის, ვინც დღეს იმსახურებს „ოცნების ქალის“ წოდებას – აიშვარია რაი პირველია“, – აღიარა ჰემა მალინიმ ჟურნალისტებთან საუბრისას, როცა მას ჰკითხეს, ვინ შეიძლება იყოს დღესდღეობით „ოცნების ქალი“.

ინტერვიუ გასულ კვირას ნიუ–დელის გარეუბანში ჩაწერეს, სადაც კონკურსის „ოცნების ქალთან შეხვედრა“ გამარჯვებულებს აჯილდოვებდნენ ჰიპერმარკეტ „Big Bazaar“–ის პრიზებით. მსახიობი ქალის ცხოვრების სირთულეებზე საუბრისას, ჰემა მალინიმ თქვა: „მსახიობი ქალის ცხოვრება ისეთივე დარჩა, როგორიც იყო – არაფერი შეცვლილა. არაფერი შეცვლილა 20 წლის განმავლობაში. მან გულმოდგინედ უნდა იმუშაოს, თავის სილამაზეს მოუაროს და კიდევ მრავალი სხვა – ბევრი ასპექტია, რომლებიც მსახიობი ქალის წარმატებას განაპირობებენ“.

ჰემამ მკვეთრი შენიშვნა გამოთქვა გამხდარი ქალების „ნულოვანი ზომების“ მოდაზე: „ამისი საჭიროება არ არსებობს. მე არასდროს მქონია ნულოვანი ზომები. გასაგებია, რომ სასურველია მსახიობ ქალს ბრტყელი მუცელი ჰქონდეს, მაგრამ უმთავრესი მაინც მომხიბლავი და ლამაზი სახეა – დამიჯერეთ ნებისმიერს აქვს შანსი გახდეს მსახიობი“.

აცი ყვითელი ფერის სარიში გამოწყობილი 60 წლის ჰემა მალინი, რომელიც 70–იანი, 80–იანი წლების ბოლივუდის ერთერთი ყველაზე კაშკაშა მსახიობი იყო, ახლაც მშვენივრად გამოიყურებოდა, როცა ჟურნალისტებმა მას მომავალი გეგმების შესახებ ჰკითხეს: „რამდენიმე კონტრაქტს მოვაწერე ხელი, მაგრამ გადაღებები ფინანსური პრობლემების და მსოფლიო კრიზისის გამო იგვიანებს. ეს პრობლემები რომ არ ყოფილიყო, ფილმები უკვე დიდი ხანია გამოვიდოდა ეკრანებზე.

ჰემა ასევე აპირებს, რომ თვითონაც გახდეს პროდიუსერი და რეჟისურასაც დაუბრუნდეს 17 წლის შემდეგ. „ვაპირებ, რომ პროდიუსერი გავხდე. არ მინდა ამაზე ბევრი ვილაპარაკო, რადგან როცა კი ამაზე ვლაპარაკობ, ასეთი რამეები აღარ ახდება ხოლმე. გადავწყვიტე შესანიშნავი ფილმები შევქმნა, იმიტომ რომ მსახიობი და ძალიან კრეატიული ადამიანი ვარ“ – ამბობს ჰემა.

ჩემი მხრიდან მინდა ამ უმშვენიერეს ქალბატონს წარმატებები ვუსურვო მის ყველა წამოწყებაში. ფილმებმა მისი მონაწილეობით ბევრ ჩვენთაგანს ინდოეთი და ინდოელები შეაყვარა. რომელი იტყვის, რომ არ იცის ვინ არის „ზიტა და გიტა“. და კიევ უამრავი სხვა ასეთი როლი. ჰემა მალინის როლები ყოველთვის გამოირჩეოდა დრამატიზმითაც და ხშირად კომიკურობითაც. ბევრი მსახიობი ქალი ასეთი კომიკური როლების შესრულებაზე პრეტენზიას დღესაც კი ვერ განაცხადებს. ლატა მანგეშკარის შემდეგ ინდოელი ქალების სიაში ჰემა მეორე ადგილზეა ჩემთვის, სინამდვილეში კი ეს ორი ქალი ერთი მთლიანობა იყო ყოველთვის მაყურებლისთვის, რადგან ფილმების უმეტესობაში ჰემა ხომ სწორედ ლატას სიმღერებს განასახიერებდა ეკრანზე.


სხვა სტატიები ამ თემაზე:
*
ინდური კინოს მუსიკა – ლატა მანგეშკარი
*
სერიალი „ზიტა და გიტას“ მოტივების მიხედვით
*
აიშვარია პარლამენტში?
*
აიშვარია რაის ბარბის თოჯინა
*
აიშვარია რაის ვარდისფერი სამყარო
*
აიშვარია მსოფლიოს ყველაზე სასურველი ქალების სიაში შევიდა
*
ბაჩანების ოჯახის ქრონიკები
*
ფილმმა „ჯოდჰა და აქბარი“ 5 ბოლივუდური „ოსკარი“ მიიღო
*
ბოლივუდის ვარსკვლავების წარსული და ამჟამინდელი რომანები
*
ბოლივუდის ვარსკვლავები კანის ფესტივალზე
*
ბოლივუდის სიახლეები მოკლედ
*
ბაჩანების ოჯახი თბილისში
*
კატრინამ აიშვარიას გაუსწრო
*
ნიკოლ კიდმანი აიშვარიას ფანატია

15.07.2009

ტირუვანამალაის ტაძარში

ვაგრძელებთ ვირტუალურ მოგზაურობას ინდოეთში. ამჯერად ჩვენი სტუმარია მოგზაური e2z00h8, რომელიც განსხვავებული კუთხით გვიყვება და გვაჩვენებს თავის განცდებს. პატარა ქალაქი ტირუვანამალაი ინდოეთის სამხრეთში მდებარეობს, თამილ–ნადუს შტატში, წმინდა მთა არუნჩალას ძირში, რომელსაც ინდუისტები ეთაყვანებიან, როგორც შივას ტახტრევანს. ქალაქში მდებარეობს სამხრეთ აზიაში ერთერთი უდიდებულესი ტაძრების კომპლექსი შივა–შაქტი.

თავყრილობა ტირუვანამალაიში – ნაწილი 1

ტირუვანამალაი ქალაქია ასეთი. თავიდან მეც მიჭირდა სახელის დამახსოვრება. ამ ქალაქში ტაძარია. ადგილობრივები მას ტემპლს (temple) ეძახიან...

ტრადიციულად, 6–ს რომ 15 აკლია, სასტუმროდან ვიძურწებით. იმიტომ რომ დილის მზე დიდხანს არ დაიცდის. ხოლო travel–ფოტოგრაფისთვის ყველაზე საინტერესო, თუკი ვინმეს დაავიწყდა, სწორედ რომ გარიჟრაზე ხდება. და მზის ჩასვლისას. დღისით შეგიძლია თავისუფლად გამოიძინო, ნამუსმა მაინც და მაინც არ უნდა შეგაწუხოს, ცხელა და...

მივჩანჩალებთ გზის ნაპირას და შოკს ვგვრით ამ დროისთვის ჯერ კიდევ იშვიათად მოსიარულე ტუკ–ტუკებს, ან რას ეძახიან მათ ინდოეთში, გამახსენეეეთ (ალბათ მიხვდით, რომ e2z00h8–ს მხედველობაში მოტო–რიქშები ჰყავს). შოკში იმიტომ, რომ ტუკ–ტუკსისტებს ყოველ დილას კია რ გაუღიმებს ბედი, რომ თავიანთი ტუკ–ტუკების სინათლის შუქზე მძინარე თვალებით გზის პირას მოსიარულე თეთრი ადამიანები დაინახონ. არა, გმადლობთ, რიქშა არ გვჭირდება, ფეხით ვაპირებთ გასეირნებას. გვითხრეს, რომ აქვე ახლოა ის ადგილი, სადაც მივდივართ.

გზად წინ ორი ადგილობრივი გვხდება, რომლებიც დილაუთენია ბადმინტონით ერთობიან. კიდევ რამდენიმე ადამიანი გზის კიდეებში ავადმყოფობს. დილის 6 საათია, არ დაგავიწყდეთ. წარმოდგენილი სურათი, რა თქმა უნდა ჩვენს წარმოსახვას სცილდება, მაგრამ შალითიდან კამერას არ ვიღებ, რადგან ასე დილაადრიან ISO3200–იც კი ვერაფერს გახდება. „ბიჭებო, – ვეკითხებით, – სად არის აქ თქვენი ტემპლი?“. „იქ“ გაიშვირეს ხელი გზის მიმართულებით. მათი სახეები სათუთად შევინახე მეხსიერებაში და გზა გავაგრძელეთ.

ცოტაც გავიარეთ და მარჯვენა მხარეს მასიურ კედელს მივადექით. ჰორიზონტზე გოპურამები ჩანს და ესე იგი მივედით ტაძართან. ჭიშკარი, რომელიც ჩვენს ცხვირწინ აღმოჩნდა, რატომღაც დაკეტილია. „რა ჯანდაბაა!?“ – გაკვირვებულები უკან მოვბრუნდით, რომ გვერდიდან შემოვუაროთ და სხვა შესასვლელი ვიპოვოთ. მარცხნივ მოვტრიალდით და ჯერ კიდევ ბინდიან ცაზე ნახევარმთვარე აღმოვაჩინეთ. თითქოს საერთო ბრძანებით, ყველა ვჩერდებით და კამერებს ვიღებთ ჩანთებიდან. შტატივი რა თქმა უნდა არცერთს არ გვაქვს, ჯერ კიდევ აფრიკაში დავფანტეთ ყველამ.

როგორ გინდა, რომ ამ გოპურამებს გადაუღო სურათი, რომ ნახევარმთვარეც იყოს კადრში, და სურათმა ზღაპრული განთიადის სურნელი არ დაკარგოს?? ბოლოს გადავწყვიტე, რომ მთვარისთვის ელექტროსადენები შემომეხვია, რომელიც გოპურამებს გვერდს უვლის. ვისაც უნდა, მთვარეს იპოვის კიდეც, სამაგიეროდ, სურათში არაფერი გაიდღაბნა.

ტაძრის შესასვლელში დეიდები ყვავილების თაიგულებს ყიდიან, თუ რა ჰქვია ამას?... გულსაკიდი ყვავილები? ტაძარში ყვავილების გარეშე შესვლა ტეხავს. ამიტომაც ადგილობრივები ტაძრის შესასვლელში დიდი ოდენობით ყვავილებს ყიდულობენ. ამ სურათზე პირადად მე ყველაზე მეტად მაღელვებს ადამიანი სურათის უკანა პლანზე, რომელსაც ლოცვაში ხელები აქვს მაღლა აღმართული.

ლუპა მივმართეთ დეიდაზე მისი შესანიშნავი ყვავილებით, მსხვილი პლანით ვიღებთ მის დაქალს, ფეხზე ვიხდით და შევდივართ ტაძარში.

ინდუისტურ ტაძარში რამდენიმე მცირე ეზოა ერთი დიდი ეზოს შიგნით. შიდა ეზოში კამერებით არ გვიშვებენ და სურათებს მხოლოდ გარე ეზოში ვიღებთ. აქაც ბევრი რამეა გადასაღები.

რაც მკლავს ინდუიზმში, არის ის, რომ ისინი თაყვანს სცემენ ძროხებს. ჩვენში ფიცარზე დახატულ ბიძას ეთაყვანებიან, რომელიც თითქოსდა ძალიან დიდი ხნის წინ ცხოვრობდა და თავისი სიკვდილით ჩვენი სულები გადაარჩინა, მერე აღსდგა და ასე შემდეგ. აქ ყველაფერი გასაგებია. კარგად რომ დაუფიქრდე, ესეც საკმაოდ უცნაურია, მაგრამ ჩემთვის საკმაოდ ჩვეულებრივი, იმიტომ რომ ისეთ ადგილებში დავიბადე და გავიზარდე, სადაც ფიცარზე დახატულ ბიძას სცემენ თაყვანს. (ციტატები მოგზაურისაა – სოსო). ხოლო ვინც ამას არ აკეთებს, ის ჩლუნგია და ანტიქრისტე. ამიტომ, ის, რომ გამოშტერებულ მცოხნარე ცხოველს ეთაყვანებიან – მაპატიონ ინდუისტებმა – ჩემამდე ვერ დადის. ეს რომ გამეგო როგორმე, დიდი ხნის მანძილზე ვუღებდი სურათებს ადამიანებს, რომლებიც ძროხის ქანდაკებებთან ლოცულობდნენ. მაგრამ მაინც ვერაფერი გავიგე.

წმინდა ძროხის ქანდაკება ჯერ ყვავილებით მოვრთოთ.

მერე ვილოცოთ. კადრის ცენტრში, ძროხის უკან ჩანს მამაკაცი, რომელიც იატაკზე განერთხო. როგორც აღმოჩნდა, ინდურ ტაძრებში ასეთი სურათი იშვიათობა არ არის.

წინა პლანზე სპილუკას ვხედავთ, რომელიც ტაძრისთვის ფულს შოულობს. ეს კი ასე ხდება. ტაძარში მისული მლოცველები სპილუკას ფულს აძლევენ, სპილუკა კი ფულს ხორთუმით ართმევს და მიმცემს თავისებურად ლოცავს, ეხება რა მის თავს თავისი ხორთუმით. ფულს კი მერე იმ კაცს აძლევს, უკანა პლანზე რომ ჩანს. ინდოელებში სარწმუნოების სიძლიერიდან გამომდინარე, დღის განმავლობაში სპლიკა კარგ ფულს უნდა აკეთებდეს.

ამ დროს კი აღმოსავლეთ გოპურამის სარკმელში მზე გამოჩნდა და სასწაულებრივი სურათი დაგვიხატა.

ორი იაპონელი ტურისტი მოჯადოებულივით უღებს სურათებს ამომავალ მზეს.

აღმოსავლეთ გოპურამის კარიბჭესთან ამომავალი მზის სხივები დიდებულ, ჯადოსნურ და ზღაპრულ სურათს ქმნიან. სურვილი გიჩნდება, გაშეშდე და დატკბე ამ მოვლენით.

ბოლივუდის ახალი ამბები მოკლედ

შაჰრუქი ეპიზოდურ როლებში თამაშს აღარ აპირებს

ამის მიუხედავად, მან გამონაკლისი გააკეთა თავისი მეგობრის მაკრანდა დეშლანდესთვის და მონაწილეობა მიიღო ეპიზოდურ როლში მის ფილმში „შაჰრუქმა თქვა: ლამაზი ხარ/ Shahrukh Bola Tu Khubsurat Ho“. ამ ფილმში შაჰრუქი, რომელიც თავის თავს ასახიერებს, მეყვავილე გოგონას ჩაუვლის (რომელსაც პრიტიკა ასრულებს) და ეუბნება მას „Tu Khubsurat Ho“, რა ნიშნავს „შენ ლამაზი ხარ“. რეჟისორ დეშპანდეს თქმით, შაჰრუქმა არამარტო უფლება მისცა, რომ რამდენიმე კადრი გადაეღოთ მის სახლსა და ავტომანქანაში, არამედ გადამღები ჯგუფი შინ მიიწვია და გაუმასპინძლდა.

გოგონები ჭკუას კარგავენ მითჰუნზე

მითჰუნ ჩაკრაბორტი ასაკის მიუხედავად პოპულარობას არ კარგავს. ფილმ Luck–ის გადაღებების დროს გადამღები ჯგუფი დიდხანს მოგზაურობდა სამხრეთ აფრიკაში. გამოიცანით, მსახიობებიდან ვინ სარგებლობდა ყველაზე დიდი პოპულარობით? რა თქმა უნდა 80–იანების „დისკოს მოცეკვავე“, საკმაოდ ასაკში შესული მითჰუნ ჩაკრაბორტი. როგორც აღმოჩნდა, სამხრეთ აფრიკაში, სადაც საკმაოდ დიდი ინდური დიასპორაც ცხოვრობს, ლეგენდარული მსახიობი ძალიან უყვართ. თაყვანისმცემლები მას ყველგან ელოდნენ, რომ ერთხელ მაინც ენახათ ცხოვრებაში ან მისგან ავტოგრაფი მიეღოთ. „მსახიობმა არ იცოდა რა ექნა, ხშირად წითლდებოდა, როცა გოგონების ჯგუფები მას კუდში დასდევდნენ. თაყვანისმცემლების სიყვარულმა და პატივისცემამ ის ძალიან გაახარა“ – თქვა გადამღები ჯგუფის ერთერთმა წევრმა. მითჰუნს თაყვანისმცემლები არც საქართველოში აკლია და დარწმუნებული ვარ, აქ ჩამოსვლა რომ ინებოს, აქაც არ მოასვენებენ მისი ერთგული მაყურებლები.

ამიტაბჰ ბაჩანმა გადაღებები გააუქმა

ბოლივუდის ცოცხალი ლეგენდა ამიტაბჰ ბაჩანი კვლავ გამოკვლევას გადის მუმბაის ჰოსპიტალში. საავადმყოფოს წარმომადგენლებმა უარი განაცხადეს ბაჩანის დიაგნოზის და ჯანმრთელობის პრობლემების კომენტირებაზე. მსახიობი ლონდონიდან მუმბაიში გასულ კვირას დაბრუნდა და გვიან ღამით პირადი ექიმი გამოიძახა, რადგან ტკივილებს გრძნობდა კუჭის არეში. ჰოსპიტალში მას სრული გამოკვლევა და კომპიუტერული ტომოგრაფია ჩაუტარეს. სანამ გამოკვლევის შედეგები არ გახდება ცნობილი და მკურნალობა დასრულებული, მსახიობმა ყველა გადაღება და მოგზაურობა გააუქმა. ეს პირველი შემთხვევა არ არის, როცა ამიტაბჰ ბაჩანს საავადმყოფოში ათავსებენ. იმედია ყველაფერი კარგად დასრულდება და 65 წლის ამაგდარი მსახიობი კიდევ მრავლად გაუხარებს გულებს მისი შემოქმედების მოყვარულთ. ასაკის მიუხედავად ის ხომ ჯერ კიდევ უამრავ ისეთ როლს თამაშობს, სადაც ახალგაზრდულ შემართებას ავლენს და ბევრ ადამიანს ამით სიცოცხლის ხალისს აძლევს.

11.07.2009

შაჰიდის ვირტუალური ორეული

Twitter–ის ინტერნეტის სოციალურ ქსელში მსახიობ შაჰიდ კაპურის ორეული მსახიობს და მის პრესმდივანს მოსვენებას არ აძლევს. ეს უცნობი ადამიანი არამარტო შაჰიდის სახელს იყენებს, არამედ ელექტრონული ფოსტით აგზავნის სიახლეებს შაჰიდის შესახებ. ახლახანს ორეულმა მსახიობის ახალი ფილმის Kaminey–ის გამოსვლის შესახებ დააგზავნა შეტყობინება, ასევე ყველა ხელმომწერს დაუგზავნა მადლობა იმისთვის, რომ მხარი დაუჭირეს და მას მისცეს ხმა, როგორც აზიის ყველაზე სექსუალურ ვეგეტარიანელს. შედეგად, უამრავი ადამიანი ეკონტაქტება ამ ორეულს, რადგან ფიქრობენ, რომ ვარსკვლავთან აქვთ მიმოწერა. ეს ადამიანი იყენებს ელექტრონულ ფოსტას shahid.kapoor@gmail.com. აღსანიშნავია, რომ ასეთი ორეულები უამრავია სხვა ქსელებშიც, მათ შორის რუსულ ოდნოკლასნიკებზე, My Space–ზე, Facebook–ზე და სხვებზე და სხვებზე. ზოგჯერ ერთ მსახიობს ერთის ნაცვლად რამდენიმე ათეული ორეული ჰყავს, რომელიც მისი სახლით ქმნიან პროფაილებს და აწარმოებენ მიმოწერას. ასეთი ორეულები თავიანთ სამეგობროებსაც კი ქმნიან და მოკლედ არჩევანი ინტერნეტში უამრავია, და შეგიძლია შენი საყვარელი მსახიობი ერთი კი არა 10 გყავდეს ერთდროულად. როგორც წესი, ორეულები ზედმიწევნით კარგად მისდევენ სიახლეებს თავისი ვარსკვლავის ცხოვრებაში და ფაქტიურად რთულია იმის გარკვევა, ვინ დგას სინამდვილეში ამ ინტერნეტ–პროფაილის უკან. ასეთ შემთხვევებში ყველაზე კარგი გამოსავალი ისაა, როცა მსახიობები და სხვა ვარსკვლავები საჯაროდ აღიარებენ, რომ აქვთ ან არ აქვთ ურთიერთობა ამ დასახელებულ სოციალურ ქსელებთან.

როდესაც შაჰიდის პრესმდივანმა მსახიობის ორეულის შესახებ შეიტყო, მას წერილი გაუგზავნა Twitter–ზე და თხოვა, რომ შეწყვიტოს მსახიობის სახელით ლაპარაკი. მან იმიტატორს მისწერა, რომ მსახიობად საკუთარი თავის გასაღება არასწორია. „თქვენ რომ თქვენი ID მომცეთ, რომელიც შაჰიდის სახელზეა გაფორმებული, ყველაფერი ამით დასრულდებოდა“.

მაგრამ ორეულმა გადაწყვიტა არ დანებებოდა გაბრაზებული პრესმდივნის მოწოდებას და პასუხად მიწერა: „არაფერს ისეთს არ ვაკეთებ, რომ შაჰიდის სახეს ვავნო. ფაქტიურად მე ვაკეთებ პრომოუშენს ვუკეთებ ყველაფერს იმას, რითაც მსახიობია დაკავებული. მე იმ საქმეს ვაკეთებ, რითაც თქვენ უნდა იყოთ დაკავებული და რაშიც თქვენ ფულს გიხდიან, თქვენ კი მე მემუქრებით. ამის ნაცვლად უმჯობესი იქნებოდა თქვენი საქმე გაგეკეთებინათ და თქვენ თვითონ შეუწყოთ ხელი მსახიობის პოპულარიზაციას“.

მსახიობის თანაშემწეს ელდა ეცა, როდესაც ეს წერილი წაიკითხა, რადგან იმიტატორმა მისი პირადი ელექტრონული ფოსტის მისამართი იცოდა. მოვლენათა განვითარებამ შაჰიდი იმდენად შეაშფოთა, რომ მან ამ საქმის სერიოზულად შესწავლა ითხოვა.

მისმა პრესმდივანმა კი განაცხადა: „ადამიანები ყალბ შაჰიდს მიჰყვებიან, ფიქრობენ, რომ ის ნამდვილია. ხვალ რომ იმიტატორმა რამე ისეთი თქვას, რაც სიმართლეს არ შეეფერება, ეს მსახიობის რეპუტაციას ძალიან დააზარალებს. ჩვენ არ შეგვიძლია, რომ ამისი გაგრძელების უფლება მივცეთ. სხვა ადამიანად საკუთარი თავის გასაღება დანაშაულია. ჩვენ შევჩივლეთ Twitter–ს და იმედი გვაქვს, რომ პასუხს მივიღებთ. ეს რომ არ მოხდეს, იძულებულნი ვიქნებით, ოფიციალური საჩივარი შევიტანოთ“.

შაჰიდ კაპურმა კი საჯაროდ უარყო კავშირი თვითმარქვიასთან: „მინდა განვმარტო, რომ Twitter–თან არანაირი შეხება არ მაქვს“.

06.07.2009

ნებისმიერი ადამიანი სინათლის წყაროა

ამ ოდნავ ფილოსოფიური სათაურის და პოსტის მთავარი თემის რეკლამის მოსაწყენი ხასიათის მიუხედავად, ამჯერად რეკლამის მხიარულ მხარეზე გავამახვილებ ყურადღებას. მიუხედავად იმისა, რომ რეკლამის მთავარი დანიშნულებაა გასაყიდი საქონელი დაგვამახსოვრებინოს და ტელეეკრანებსა თუ სხვა ადგილებში ეს რეკლამა ხშირად თავსაც კი გვაბეზრებს, მაგრამ როგორც აღმოჩნდა, ამას სხვა მხარეც ჰქონია. თურმე რეკლამას შეუძლია კარგ ხასიათზე დაგვაყენოს, ჩვენი ცხოვრების ბედნიერი მომენტები გაგვახსენოს და კიდევ ბევრი დადებითი ემოციები მოგვგვაროს. პირველ რიგში შემოგთავაზებთ საღეჭი რეზინის ინდურ რეკლამას, რომელმაც ამ ორიოდე წლის წინ როდესაც ვნახე, შეიძლება ითქვას რეკლამის მიმართ დამოკიდებულება შემაცვლევინა. 2007 წელს ამ სარეკლამო რგოლმა კანის კინოფესტივალზე ოქროს ლომი დაიმსახურა. ჩემი აზრით, ნამდვილად ეკუთვნოდა :)


აქვე გთავაზობთ კიდევ რამდენიმე ინდურ სარეკლამო რგოლს, რომელთა ნახვის შემდეგაც იმ ადამიანებს, ვისაც ინდოეთი უყვარს, და არა მარტო ამ ადამიანებს, კარგი ხასიათი გარანტირებული აქვთ.

ეს არის ხველების წამლის "გლიკოდინის" რეკლამა:


ეს კრეკერების რეკლამაა:


ეს არის "ბინდის", შუბლზე გასაკეთებელი ნიშნის საღებავის რეკლამა. ამ ნიშანს გათხოვილ ქალებს უკეთებენ. ითვლება, რომ ბინდი იმ ადგილზე, სადაც მას უკეთებენ, ქალს უცხო მამაკაცებისგან დაიცავს, იმიტომ რომ მამაკაცები ხშირად აღვირახსნილები არიან. ხოლო გათხოვლმა ქალმა თავის მეუღლეს ერთგულება უნდა შეუნახოს. ეს თავისებური დამცავი ნიშანია გათხოვილი ქალის პატიოსნებისათვის:


03.07.2009

Господин Браганза, შარვლის უბე შეიკარი! :)

ვერ წარმომიდგენია ადამიანი, რომელსაც ინდოეთი აინტერესებდეს, ინდური კინოც უყვარდეს და ნანახი არ ჰქონდეს ფილმი „ბობი“ და მისი სიმღერები არ მოსწონდეს. წუხელ ინდური კინოს მოყვარულებს, განსაკუთრებით კი ძველი თაობის წარმომადგენლებს ტელეკომპანია „კავკასიამ“ კიდევ ერთხელ გვაჩუქა სასიამოვნო საღამო და „ბობი“ გვაჩვენა რუსული დუბლირებით და კარგი ხარისხით. ძველი ინდური ფილმების ნახვისას ძველ რუსულ დუბლირებას დიდ მნიშვნელობას ვანიჭებ, რადგან მთელი ექსპრესიულობა და ემოციების სიძლიერე სრულად არის ასახული ამ დუბლიაჟში.

ამ თემაზე რამდენიმე ჩემს მეგობართან არაერთხელ მისაუბრია, რომელთან მე ინდოეთისა და ინდური კინოს „ექსპერტებად“ ვთვლი, და მათგანაც ბევრი საინტერესო ინფორმაცია მაქვს მიღებული. მაგალითად ის, რომ ძველ საბჭოთა დუბლირებაში ცნობილი და პროფესიონალი მსახიობები მონაწილეობდნენ და მეტწილად მათი დამსახურებაა, რომ ჩვენს ბავშვობაში ნანახი ფილმები ასე ახლო მიგვქონდა გულთან და ასე განვიცდიდით გმირების თავგადასავლებს. როგორც ამ ერთერთმა მეგობარმა „ექსპერტმა“ მითხრა, რომელიც საკმაოდ კარგად ფლობს ჰინდის ენას, ზოგ მომენტებში ეს ძველი რუსული დუბლირებული ფილმები რუსულად უფრო კარგი და სახალისო საყურებელია, ვიდრე ორიგინალში, რადგან საბჭოთა მსახიობები და დუბლირების ოსტატები იმდენად ხატოვნად აკეთებდნენ თავის საქმეს, რომ ორიგინალში ჩადებულ აზრს ხშირად აუმჯობესებდნენ და ამით დუბლირებული ფილმის ხარისხიც უმჯობესდებოდა. ეს ყველაფერი კი ამ ფილმებს ისეთივე პოპულარულს ხდიდა ჩვენთან, როგორც ინდოეთში. თბილისში არ ვიცი, მაგრამ რეგიონებში, პატარა ქალაქებში, დაბებსა და სოფლებში არსებული კინოთეატრები და კლუბები ასეთი ფილმების ჩვენებისას მაყურებელთა ნაკლებობას არასდროს უჩიოდნენ, სულაც რომ ჩვენება ზედიზედ 10–ჯერ ყოფილიყო. ამის მიზეზად ზოგი იმასაც ასახელებს, რომ ვიდეო–კულტურის შემოსვლამდე საბჭოთა კავშირში სხვა ფილმებზე – ევროპულსა და ჰოლივუდურზე მოსახლეობას ხელი არ მიუწვდებოდა, და ძალაუნებურად ინდური ფილმები იყო პოპულარულიო, თუმცა მე მათ მთლიანად ვერ დავეთანხმები, თუნდაც იმიტომ რომ ბევრი ახალგაზრდაა, სულ ახალი თაობის წარმომადგენლები, თბილისშიც და რეგიონებშიც, ვინც ინდური ფილმებითაა გატაცებული და დღეს ნამდვილად ვერავინ იტყვის, რომ სხვა კინოპროდუქცია დეფიციტშია.

ახალი ბოლივუდური ფილმები, როგორც წესი ნაკლებადაა დუბლირებული, მიდის პირდაპირი თარგმანი, და როგორც წესი ამ ფილმებს თვითონ მთარგმნელები ახმოვანებენ. რა თქმა უნდა ორიგინალური ტექსტები ფილმს თან გასდევს, მაგრამ ამ ყველაფერში საბოოლოო ჯამში ძალიან, თუ არა საშინლად იკარგება ხარისხი, როგორც ხმის, აუდიო ეფექტების, სიმღერების და საერთოდ ყველაფრის. „ჯურღმულელი მილიონერი“ ბოლივუდური ფილმი სულაც არ არის, მაგრამ რა უქნეს დუბლიაჟს? რუსული დუბლირება აბსოლუტური კოშმარია, უხარისხო, არაეფექტური, ფილმის მუსიკა, რომელსაც „ოსკარიც“ კი ერგო, ფილმში საერთოდ არ ისმის. და წარმოიდგინეთ რა დაემართა ფილმს ქართულად თარგმნისას... როგორც ერთმა მეგობარმა მითხრა, რომელმაც გარისკა და „ამირანში“ წავიდა ფილმის სანახავად, მითხრა, რომ იმდენად ცუდად იყო გახმოვანებული, რომ თვითონ ფილმში მუსიკალური თანხლებაც კი არეული იყო სხვადასხვა სცენებში, რომ არაფერი ვთქვათ იმაზე, რომ ეს მუსიკაც კი თითქმის არ ისმოდა...

რუსულად არაპროფესიონალურად ნათარგმნ ინდურ ფილმებს რაც შეეხება, ეს უკვე სხვა მეგობარმა, მოსკოვში მცხოვრებმა ჟურნალისტმა მითხრა, რომ ისინი, ვინც ამ ფილმების რუსულენოვან ბაზარზე რეალიზაციით არიან დაკავებულნი, იძულებულნი არიან ასეთ თარგმანს დათანხმდნენ, რადგან პროფესიონალური დუბლირება ძალიან ძვირი ჯდება, მინიმუმ 100–200 ათასი დოლარი, და ეს მხოლოდ ერთი ფილმისთვის. ჰო და აქედან გამომდინარე უკვე ცხადია რატომაც ხდება ეს ყველაფერი... და ეს იმის გათვალისწინებით, რომ თანამედროვე რუსი მსახიობები სულაც არ არიან იმ დონის, რაც თავის დროზე საბჭოთა მსახიობები იყვნენ და როგორც ისინი უდგებოდნენ თავის საქმეს.

ახლა კი ის, რითაც დავიწყე – „ბობი“.


18 წლის რაჯს და 16 წლის ბობის პირველივე შეხვედრისას უყვარდებათ ერთმანეთი. მაგრამ ახალგაზრდებს ეტყობა ერთად ყოფნა არ უწერიათ... რაჯის მდიდარი და „პატივსაცემი“ მშობლები არასდროს დათანხმდებიან, რომ მათმა ვაჟმა ვიღაც ღარიბი მეთევზის ქალიშვილი შეირთოს ცოლად, თუნდაც ის მსოფლიოში ყველაზე ლამაზი გოგონა იყოს. სიყვარულს წინ აღუდგება ინდური საზოგადოების მკაცრი კანონები და კასტური უთანასწორობა. (თუმცა ფილმის რუსულ ვერსიაში სიტყვა „კასტა“ არსად არ მოიხსენიება, ეს ეტყობა საბჭოთა გავლენის ბრალი იყო, მაგრამ ჭეშმარიტი მიზეზი არ ვიცი). ახალგაზრდები იძულებულნი არიან თავიანთი ძლიერი გრძნობა დაიცვან. და ფილმის დასასრული... ვისაც არ უნახავს, მერწმუნეთ ნასიამოვნები დარჩებით.

მომხიბლავი რიში კაპური, ულამაზესი დიმპლ კაპადია, ჯეკ ბრაგანზას შემსრულებელი პრემ ნათჰი, აუცილებლად უნდა ვახსენოთ მუდმივი ბოროტმოქმედი პრემ ჩოპრა, და კიდევ მრავალი სხვა – ფილმში მსახიობების საუკეთესო ბუკეტი შეარჩია რაჯ კაპურმა, მას ეს ნამდვილად არ ეშლებოდა. და რა თქმა უნდა, ლატა მანგეშკარის ზებუნებრივი წმინდა ხმა და სასიამოვნო მელოდიები...

ამ ფილმზე, მასში მონაწილე მსახიოებებზე, მუსიკაზე, რეჟისორზე და ბევრ ბევრ რამეზე, რაც ფილმთანაა დაკავშირებული, ალბათ სქელტანიანი „ენციკლოპედიის“ დაწერაც კი შეიძლება, მაგრამ სიტყვა მემგონი ძალიან გამიგრძელდა და ამჯერად ამით შემოვიფარგლები.

აქ კი იგივე სიმღერა, რომელიც წინა კლიპშია, ახალ ფილმში სახელწოდებით MUJHSE DOSTI KAROGE.