ახალი სიურპრიზები დენი ბოილისგან

მიუხედავად იმისა, რომ ეს ადამიანი ეთნიკურად ინდოელი არ არის, აშკარაა, რომ ამ ქვეყნისადმი სიყვარულმა მას დიდი რამ გააკეთებინა და კიდევ ბევრის გაკეთებას აპირებს, როგორც აღმოჩნდა. სასიამოვნოა ის ფაქტიც, რომ შრომა და სიყვარული თავისი საქმისადმიც უფასდება და ეს ოსკარების ცვენაშიც აისახა. ბოილის „ჯურღმულელ მილიონერზე“, სხვაზე რომ აღარაფერი ვთქვა, მე თვითონაც იმდენჯერ დავწერე, ცოტა მეუხერხულება კიდეც, ვინმემ გადარეულ ფანატად არ ჩამთვალოს, მაგრამ როცა ხდება სიახლე და საინტერესო მოვლენები, რთულია გვერდი აუარო, მით უმეტეს, რომ ამ მოვლენებს მომავალში შესაძლოა ძალიან საინტერესო გაგრძელებაც მოჰყვეს, ასე რომ კიდევ არაერთხელ მომიწევს, როგორც ეტყობა, ამაზე წერა :)

„ჯურღმულელმა მილიონერმა“ უამრავ დასავლელ რეჟისორს გაუჩინა სურვილი, რომ ინდოეთის თემა აესახა თავის შემოქმედებაში. ბოლივუდის მსახიოებებზე ლამის რიგები დადგეს, იმდენ ახალ ფილმებში იწვევენ. თვითონ ინდოეთშიც იმდენი ახალი კინოლენტის გადაღებები მიმდინარეობს დასავლელი რეჟისორების ხელმძღვანელობით, რომ ალბათ მალე ბოლივუდის მსგავსად მთელ დასავლურ კინოსაც ინდოეთი დაიპყრობს. ეს რა თქმა უნდა ხუმრობით :)

სინამდვილეში კი, დენი ბოილმა ეტყობა გადაწყვიტა სხვებს არ ჩამორჩეს და საკუთარი წარმატების საკუთარივე მიზნებში მოხმარების მიზნით ახალ სამუშაოს შეუდგა.

ჩემთვის უსაყვარლეს მუმბაიში, სადაც მხოლოდ ერთი კვირის გატარება მოვასწარი, მაგრამ სამუდამოდ შევიყვარე ეს ქალაქი, დენი ბოილი ტრილერის გადაღებას აპირებს ქალაქის ღამის ცხოვრების შესახებ სუქეთ მეჰთას რომანის «Maximum City: Bombay Lost and Found»–ის მიხედვით. მან უკვე შეიძინა რომანის ეკრანიზაციის უფლებები, რომელიც 2004 წელს გამოიცა და უკვე გადათარგმნილია მრავალ ენაზე.

გარდა ამისა, დენი პროდიუსერის როლშიც მოგვევლინება სხვა ახალ ფილმში, რომელსაც ასევე ცნობილი, ამჯერად წარმოშობით ინდოელი რეჟისორი შექარ კაპური გადაიღებს. შექარ კაპური ავტორია ისეთი საკულტო ფილმებისა, როგორებიცაა „მისტერ ინდოეთი“ და ორგზის ოსკაროსანი „ელიზაბეტი“. შექარმა დენი ბოილს დახმარება თხოვა ახალი პროექტის „კოკისპირული წვიმა/Paani“ განხორციელებაში.

შექარ კაპური და დენი ბოილი ერთმანეთს 10 წელზე მეტია იცნობენ და დენი ყოველთვის ურჩევდა შექარს, რომ ბოლივუდის ფილმები აკეთოს და ჰოლივუდის წინადადებებზე არ აიღოს ორიენტაცია. და აი, როდესაც დენი ტრიუმფალურად დაბრუნდა ინდოეთში ჯილდოებით დამძიმებული, შექარმა მას თავისი ახალი ეთნიკური კინოპროექტის შესახებ მოუთხრო, რომლის გადაღების დაწყებაც რამდენჯერმე გადაიდო ფინანსური პრობლემების გამო. საბოლოო ჯამში კი დენი დათანმხდა მას, რომ ფილმს „კოკისპირული წვიმა“ პროდიუსერობა თავის თავზე აიღოს.

გამოდის, რომ უახლოეს მომავალში კვლავ ინდოეთის თემაზე მსოფლიოში განთქმული ორი უნიჭიერესი ადამიანის მიერ ცალ–ცაკლე და ერთობლივად შექმნილი ნამუშევრები გველის. ჩემს მეგობრებს წინასწარ ვჯავშნი, რომ როცა ეს ფილმები გამოვა, საინტერესო ჩვენებები მოვიწყოთ ვიწრო წრეში მასალა ჩაისა და სხვა ინდურ–აღმოსავლური ატრიბუტიკის თანხლებით :)

სხვა სტატიები ამ თემაზე:
* ვნებანი მილიონერის გარშემო გრძელდება
* მუმბაის ხელისუფლებამ „ჯურღმულელი მილიონერის“ 20–მდე პატარა გმირი ქუჩაში გაყარა
* ფრეიდა პინტო მსოფლიოს ყველაზე სექსუალური ქალების სიაში
* «მილიონერის“ მიერ გამოწვეული მღელვარებანი არ ცხრება
* რუბინას მამას ქალიშვილის გაყიდვა სურდა 200 ათას გირვანქად
*„ჯურღმულელი მილიონერის“ მსახიობ ბავშვებს გაუმართლათ
* მილიონერმა მუმბაის ჯურღმულებიდან თბილისში ჩამოაღწია
* სიურპრიზი ოსკაროსანი „მილიონერის“ ფანებს
* ფილმის „მილიონერი ჯურღმულებიდან“ ტრიუმფი „ოსკარით“ დაჯილდოების ცერემონიაზე
* „მილიონერი ჯურღმულებიდან“ ნამცხვარი „ნაპოლეონის“ შეფუთვით
* ფილმმა „მილიონერი ჯურღმულიდან“ მთავარი „ოქროს გლობუსი“ მიიღო
* მოგზაურობა დარჯილინგში